Per cartografiar, fau nommar lei causas sensa lei mesclar. Lo Portau presenta lei nocions necessàrias per comprendre una mapa e contribuir. Lo wiki OpenStreetMap en occitan demòra la referéncia tecnica per lei claus, lei valors e lo vocabulari dei categorias cartograficas.
Cinc nocions per començar
Element cartografic
Un objècte representat dins OpenStreetMap: una cima, un camin, un bastiment, una associacion… L’element descriu çò qu’existís sus lo terren.
Ponch, linha e zòna
Un ponch localiza un objècte; una linha es l’element tecnic que religa de nos e pòt seguir un camin, un cors d’aiga ò lo limit d’una zòna; una zòna ne’n dessenha lei limits. Camin nomma doncas un objècte possible; linha, sa geometria cartografica. La geometria deu correspondre a l’objècte, pas a nòstra inspiracion dau jorn.
Relacion
Una relacion agropa mai d’un element per descriure un ensems: un itinerari, una linha de transpòrt, un limit administratiu ò una zòna complèxa.
Etiqueta
Una etiqueta descriu l’element amb una clau e una valor. Per exemple natural=peak indica una cima. Lo wiki explica quina etiqueta convèn a cada objècte.
Mencion
La mencion es lo nom portat per l’objècte. La forma occitana se nòta dins name:oc; sa fònt pòt èstre indicada dins source:name:oc.
Lo tipe d’un objècte es pas lo nom
Bauç, cima, fònt, escòla ò associacion pòdon descriure una categoria cartografica. Lo nom pròpri identifica l’objècte. Fau destriar lei dos: la categoria ajuda la maquina a comprendre; la mencion ajuda lo monde a reconóisser lo luòc.
Se lo generic fa vertadierament partida dau nom atestat, pòt figurar dins la mencion. Mai lo mot present dins un nom indica pas totjorn la natura cartografica de l’objècte.
Quauqueis exemples
- Mar de Bèrra: Mar fa partida dau nom, mai l’objècte es de tipe estanh, pas mar. Lo cartografe descriu la natura vertadiera de l’objècte sensa corregir son nom.
- Fònt de Vauclusa: Fònt fa partida dau nom; l’objècte es un sorgent naturau, pas una fònt decorativa.
- Mont Ventor: Mont fa partida de la forma toponimica. Demòra dins lo nom, mentre que la categoria cartografica descriu lo relèu.
- Una escòla sonada « Calandreta dau país »: escòla es lo tipe d’establiment; lo nom de retenir es la forma oficiala ò documentada, sensa ajustar Escòla davant se ne’n fa pas partida.
- Una associacion sonada « Lei Camins d’Òc »: associacion descriu l’organisme, mai es pas de metre dins lo nom se l’estructura se presenta simplament coma Lei Camins d’Òc.
Onte trobar lo mot que convèn?
- Per la categoria cartografica e son emplec tecnic: consultatz leis Elements cartografics dau wiki OSM.
- Per la forma occitana d’un nom: consultatz lei fònts toponimicas, BDTopoc e lei règlas d’escritura dei noms pròpris.
- Per un mot generau e sei variantas: consultatz lei diccionaris e lei lexics occitans reconeguts.
La variacion dialectala es normala. La chausida deu correspondre au luòc, a l’us e ai fònts; una lista unica pòt orientar, pas escafar lo parlar locau.
Question de verificacion
Per una cima dicha « Mont Ventor », fau escriure name:oc=Cima Mont Ventor per explicar son tipe?
Veire la respònsa explicada
Non, pas se Cima fa pas partida dau nom documentat. L’etiqueta cartografica descriu ja l’objècte coma una cima; name:oc deu contenir la mencion autentica.
Lei paginas de terminologia dau Portau
- Lexic de la cartografia occitana: comprendre lei mots generaus de la mapa;
- Lexic de la senhaletica: legir e preparar lei mots emplegats sus lei panèus;
- Contribuir a la terminologia: documentar un tèrme, una varianta ò un us locau.