Anar au contengut
Portau

Escritura de la mencion : cas dei noms pròpris

Un nom pròpri se traducciona pas a l’azard. Avans de lo metre sus la mapa, fau cercar la forma occitana autentica, verificar son us e retenir una forma documentada. Lo principi es simple: restablir, pas inventar.

Una placa bilingüa es documentada amb son tèxte exacte, son supòrt, sa lenga, son luòc e sa data.
Una placa es una fònt de documentar e de comparar, pas una respònsa de copiar sensa verificar.

Lei principis essenciaus

  1. Partir dei fònts. Consultatz leis obratges toponimics, leis enquistas, leis archius, BDTopoc e lei publicacions reconegudas. Una forma vista un còp sus Internet es una pista, pas encara una pròva.
  2. Preferir la forma occitana atestada. Quand un nom a una forma occitana tradicionala, emplegatz-la: Jean Jaurès vèn Joan Jaurés dins una mencion occitana.
  3. Conservar çò que se deu conservar. Un patronim estrangier se desfigura pas per semblar occitan: Pierre Schumacher pòt venir Pèire Schumacher, mai Schumacher demòra Schumacher.
  4. Passar pas obligatòriament per lo francés. Per un nom estrangier, partètz de la lenga d’origina ò d’una transliteracion reconeguda, levat quand existís una forma occitana tradicionala.
  5. Adaptar la mencion dins son ensems. Lo generic e lei mots de ligason seguisson l’us occitan: Avenue Charles de Gaulle → Avenguda Carles de Gaulle; rue de Saint-Vincent-de-Paul → Carriera de Sant Vincenç de Pau.
  6. Relire la forma finala. Verificatz leis accents, leis apostròfs, lei majusculas, lei jonhents e lei complements. Una letra pichona pòt faire un bèu cambiament.
Un dobte? Conservatz la forma actuala, notatz vòstra question e cercatz una fònt melhora. La mapa pòt esperar un pauc; una error ben installada, ela, saup demorar.

La brocadura completa

Per lei cas de personas, de país, de noms estrangiers e de transliteracion, consultatz la brocadura Règlas d’adaptacion dei noms pròpres. La pagina dau Portau ne’n dona lo camin; la brocadura dona lo detalh.

Verificatz s’avètz comprés

1 — Una personalitat occitana

Quina mencion retendriatz: Rue Jean Jaurès, Carriera Jean Jaurès ò Carriera Joan Jaurés?

Veire la respònsa explicada

Carriera Joan Jaurés, se la forma occitana es documentada. Lo generic e lo prenom son occitans; lo patronim seguís sa forma atestada.

2 — Un patronim estrangier

Fau transformar Schumacher per lo faire semblar occitan?

Veire la respònsa explicada

Non. Se pòt escriure Pèire Schumacher, mai lo patronim estrangier demòra dins sa forma pròpria.

3 — Un nom de sant

Fau conservar totei lei jonhents de Saint-Vincent-de-Paul dins la mencion occitana?

Veire la respònsa explicada

Non. La mencion occitana seguís sa pròpria composicion: Sant Vincenç de Pau.

Avans de contribuir

  • Ai una forma occitana autentica e documentada.
  • Ai verificat la composicion completa de la mencion.
  • Pòdi indicar la fònt emplegada.
  • Se demòra un dobte, corriegi pas encara.