GeoOccitania recampa la recèrca toponimica, lei donadas dubèrtas, la cartografia liura e la transmission. Lo pretzfach, començat per l’Institut d’Estudis Occitans en 2007, vòu restablir lei noms autentics e lei rendre visibles, audibles e utilizables dins la vida vidanta.
Nòstrei objectius prioritaris
Emplegar la mapa
Veire l’espaci occitan, cercar un luòc, preparar una mapa de classa, emplegar un GPS e explorar de visions tematicas.
Corregir ponctualament
Verificar un nom e publicar una correccion simpla amb iD, Go Map!! ò Vespucci.
Aprendre e transmetre
Donar de metòdes clars, d’exercicis, de respònsas documentadas e de demostracions cortas per venir autonòm.
Collectar e documentar
Recampar lei formas toponimicas, sei fònts e son istòria dins BDTopoc, mantenir puei lo depaus public sus data.gouv.fr.
Bastir lo Geoportau
Veire e ausir l’espaci occitan, activar de jaças tematicas e donar accès ai servicis cartografics e pedagogics associats.
Un ensems de pèças complementàrias
| Pèça | Ròtle |
|---|---|
| Lo portau GeoOccitania | Lo Portau: mapa en premier, metòdes, tutoriaus, ressorsas, istòria e actualitats dau projècte. |
| L’aplicacion web GeoOccitania | La mapa interactiva dedicada a la recèrca, la verificacion e la participacion. Se pòt gardar sus lo telefonet sensa passar per una botiga. |
| La Mapa occitana | Lo rendut cartografic que fa aparéisser lei noms occitans presents dins OpenStreetMap. |
| BDTopoc | Lo recampament dei formas documentadas e de sei fònts; lo depaus data.gouv.fr n’es la referéncia publica. |
| OpenStreetMap | La basa cartografica liura e collaborativa ont lei noms, leis objèctes e lei servicis son integrats. |
| Lo wiki OSM en occitan | La documentacion tecnica actualizada dei categorias, claus, valors e tèrmes cartografics. |
| Lei mejans de comunicacion | Facebook GeoOccitania, publicacions, conferéncias e, se l’us se confirma, d’autrei rets per mostrar lo trabalh e recampar de contributors. |
Un trabalh collectiu que se conóis
Lei noms integrats dins OpenStreetMap partent de BDTopoc pòdon portar la fònt source:name:oc=ieo-bdtopoc. Aqueu traçament permet de mesurar l’òbra complida, d’o verificar e de mostrar sa progression en nombre brut e en percentatge de la cartografia occitana. Lo recompte actualizat a sa plaça sus l’acuelh dau Portau. Dona una visibilitat au trabalh dei seccions, cercaires, locutors, cartografes e contributors sensa faire passar una òbra collectiva per un miracle informatic.
Una utilitat sociala
Per leis escolans e leis ensenhaires
Una mapa en occitan per situar, comparar, preparar un cors, una sortida ò un trabalh de territòri.
Per lei militants e leis associacions
De donadas e d’aisinas per rendre visibles lei luòcs, lei servicis, leis escòlas e lo malhum occitanista.
Per lei locutors e lei familhas
Retrobar lei noms dau país sus la mapa e dins lo GPS, e transmetre una conoissença locala.
Per lei cercaires e lei collectivitats
Consultar de formas documentadas, identificar lei fònts e preparar de produchs cartografics ò de senhaletica.
Donadas liuras, responsabilitat partejada
GeoOccitania s’apiela sus de donadas dubèrtas e sus lo trabalh de comunautats diferentas. Cada contribucion se deu verificar, documentar e respectar lei licéncias. Restablir un nom autentic demanda de rigor; o rendre disponible demanda de mantenença. Lo depaus BDTopoc, lo wiki, lei tutoriaus e lei paginas dau Portau se devon ansin actualizar regularament. La vitrina es utila solament se çò que mòstra es encara viu.
Participar
Podètz començar sensa èstre especialista: explorar la mapa, verificar un luòc que conoissètz, senhalar una manca, documentar una forma ò seguir un tutoriau. Lei contribucions regularas e lei recèrcas especializadas vènon puei.