Fònts e traçabilitat

Un toponim sensa fònt es coma un camin sensa partença: se pòt seguir, mai se saup pas d’onte vèn. La traçabilitat permet de verificar, corregir e transmetre lo trabalh.

Qu’es una fònt?

Una fònt es lo document, lo testimoniatge ò lo jòc de donadas que permet d’atestar una forma. Pòt èstre:

• una enquista orala documentada;
• un obratge toponimic ò lingüistic;
• un archiu, un cadastre ò una mapa anciana;
• una publicacion d’una institucion ò d’una collectivitat;
• un jòc de donadas dubèrt amb sei metadonadas e sa licéncia.

Una pagina web sens autor, data ni referéncia pòt donar una pista. Es pas encara una fònt solida.

Fònt, contributor e licéncia

Aquelei tres causas son pas parieras:

• la fònt explica d’onte vèn l’informacion;
• lo contributor ditz cu l’a recampada, verificada ò integrada;
• la licéncia precisa coma la donada pòt èstre reutilizada.

Conóisser l’autor d’una modificacion remplaça pas la referéncia dau document. E citar un libre dona pas automaticament lo drech de ne’n recopiar tota la matèria.

Dins OpenStreetMap

Per una forma venguda de BDTopoc, notatz:

name:oc=Forma occitana source:name:oc=ieo-bdtopoc

source:name:oc documenta precisament la fònt dau nom occitan. Fau pas remplaçar una autra fònt valida per ieo-bdtopoc se la forma es venguda d’un autre trabalh. Se la justificacion demanda mai d’explicacions, escrivètz un comentari de cambiament cort e precís. Per exemple: « nom occitan verificat dins BDTopoc; forma e objècte repassats ». Per una forma sosprenenta ò contestada, donatz una justificacion precisa: « < occitan : radical… + sufix… ».

Dins BDTopoc

Una ficha toponimica deuriá permetre de retrobar:

• l’entitat geografica concernida;
• la forma retenguda e sei variantas;
• la fònt completa e sa data;
• lo territòri e lo parlar;
• lo contributor ò lo responsable de la verificacion;
• una nòta quand la chausida es discutida;
• la data de mesa a jorn.

De fònts divèrsas, pas una mescladissa sensa memòria

BDTopoc es venguda de trabalhs dau malhum de l’IEO, de recèrcas localas, de contribucions especializadas e de donadas dubèrtas compatiblas. Fau conservar la referéncia de cada apòrt, tanben quand de miliers de formas son recampadas dins lo meteis depaus. Aqueu trabalh deu fòrça a J.-F. Blanc per lei comunas limitròfas, Rosella Pellerino per lei Valadas occitanas e Patrici Bernissan per la tipologia toponimica, emai a l’òbra de membres nombrós dei seccions de l’IEO. Aquelei contribucions fan partida de l’istòria dau projècte.

Repassar una fònt

1. Identificatz l’autor ò l’organisme.
2. Notatz lo títol, la data, la pagina ò l’identificant.
3. Verificatz que la fònt parla bèn dau meteis objècte.
4. Comparatz amb una autra fònt se la forma es ambigüa.
5. Notatz la licéncia quand se tracta d’un jòc de donadas.
6. Gardatz una explicacion dei correccions importantas.

Verificatz s’avètz comprés

Una persona vos dona oralament un nom de quartier. Podètz escriure solament « fònt: Joan »?

Veire la respònsa explicada

Es pas pron. Amb son acòrdi, notatz au mens la data, lo luòc, lo tipe de testimoniatge e çò que foguèt verificat. Se lo nom es sensible ò se la persona vòu demorar anonima, gardatz una traçabilitat adaptada sensa publicar de donadas personalas.