Mai de dètz-e-nòu ans d’òbra collectiva
GeoOccitania es un nom novèu per recampar un pretzfach començat per l’IEO en 2007. Cada etapa a bastit una pèça de l’ensems actuau: collècta, donadas, cartografia, transmission e servicis.
Programa toponimic e LUÒCS
La Comission Toponimica Occitana de l’IEO organizèt la restitucion dei noms autentics. En 2012, la basa LUÒCS ne’n venguèt la premiera mòstra publica.
Una cartografia dubèrta
A Ais de Provença, lo projècte LUÒCS es presentat coma un pretzfach collectiu de cartografia en donadas dubèrtas. 256 personas aguèron respondut a la crida a contribucion.
BDTopoc e OpenStreetMap-oc
Lo dispositiu s’organizèt alentorn de BDTopoc, per la collècta e la documentacion dei formas toponimicas, e d’OpenStreetMap-oc, per leis integrar dins OpenStreetMap.
Reconoissença institucionala
BDTopoc se presentèt a l’Ostau de Region de Tolosa coma una basa de donadas dubèrtas e contributivas per la toponimia occitana.
La mapa vèn un GPS
OsmAnd-oc donèt accès a la Mapa occitana sus lo telefonet. Lo GPS, vengut d’una collaboracion entre l’IEO, OpenStreetMap França e OsmAnd, recampa lei toponims, la cartografia e de contenguts de la Wikipèdia occitana.
Lo Portau GeoOccitania
Lo Portau GeoOccitania recampa desenant la mapa, l’aplicacion web, BDTopoc, leis aisinas de contribucion e lei ressorsas pedagogicas.
Un nom novèu, un trabalh que contunha
GeoOccitania escafa pas leis etapas precedentas. LUÒCS, BDTopoc, OpenStreetMap-oc e OsmAnd-oc demòran lei pèças e lei traças d’una òbra meteissa: recampar la conoissença, restablir lei noms e ne’n tornar l’usatge.
Lo cambiament de nom permet de presentar l’ensems pus clarament e de bastir un Geoportau que liá la mapa, lei donadas, lei metòdes e leis us.
Documents e testimoniatges
Lei presentacions, afichas, articles, emissions e conferéncias seràn recampats dins lei ressorsas. Permeton de documentar leis etapas dau projècte e de mostrar que la cartografia occitana es una òbra collectiva de lònga tòca.