GeoOccitania cartografia l’Occitania lingüistica: de l’Atlantic ais Aups e dau Lemosin ai Pirenèus, l’espaci ont l’occitan es ò foguèt lenga dau país. Aquò se deu pas confondre amb la region administrativa francesa dicha « Occitanie ».
Un espaci que passa lei frontieras
L’espaci occitan s’estend sus mai d’un Estat e mai d’una region administrativa. Recampa de territòris dau sud de l’Estat francés, la Val d’Aran, lei Valadas occitanas d’Itàlia e l’illa lingüistica de La Gàrdia en Calàbria.
Lei frontieras administrativas son de linhas netas. Lei limits lingüistics, elei, pòdon èstre istorics, progressius ò discutits. GeoOccitania deu mostrar aquela realitat sensa transformar una aproximacion en certitud.
Aqueu traçat s’inscriu dins lo Projècte Comunas d’Occitània / Identificacion de las comunas de J.-F. Blanc, que servís de referéncia per verificar lei comunas e lei zònas limitròfas.
Cartografiar pas a còps de regla
Una comuna administrativa es pas totjorn lingüisticament omogena. Dins lei zònas de contacte, una partida de la comuna pòt èstre occitana e l’autra non. Fau doncas observar lei localitats, lei valadas, leis usatges e lei fònts, pas solament colorar tota una superficia.
- Comuna tota occitana: la documentacion pòt tractar l’ensems comunau.
- Comuna occitana per part: fau trabalhar a l’escala dei localitats e dei sectors atestats.
- Cas discutits: gardatz lei fònts, lei variantas e una nòta explicativa.
Lei Valadas occitanas d’Itàlia
Lei mapas, lei recomptes de comunas e lo fichier tabulari de 2018 son desenant de documents d’archiu. Per trabalhar sus lei Valadas, fau verificar lei nombres, lei limits e lei liames amb lei donadas actualas.
La matèria utila demòra:
- la necessitat de destriar comuna, capluòc e fraccions;
- lei comunas occitanas per part solament;
- la traçabilitat dei formas italianas, occitanas e localas;
- lei contribucions dei especialistas e dei locutors dei Valadas;
- lo cas de La Gàrdia, separada geograficament dei Valadas alpinas.
Per èstre utilizadas, lei donadas actualizadas son de recampar dins BDTopoc e de documentar dins lo depaus data.gouv.fr, pas de laissar dins un tablèu isolat.
Quina forma metre sus la mapa?
Lo nom occitan se determina amb de fònts lingüisticas, istoricas e localas. L’apartenéncia administrativa ò una declaracion institucionala sufís pas totjorn. Fau destriar:
- lo nom oficial dins l’Estat;
- lo nom occitan atestat;
- lei variantas localas;
- lo tipe de luòc cartografiat;
- la fònt e la data de verificacion.
Un Geoportau per veire l’ensems
La mapa se deu durbir sus un cadratge que presenta tota l’Occitania lingüistica. Puei lei jaças tematicas permeton de veire lei toponims, l’idronimia, lo relèu, lo patrimòni, lei transpòrts e lei luòcs de practica sensa esmarrar l’unitat de l’ensems.
Verificatz s’avètz comprés
Una comuna es occitana dins doas localitats solament, mai son capluòc es dins una zòna d’un autre parlar. Fau marcar tota la comuna coma occitana?
Veire la respònsa explicada
Pas automaticament. Fau cartografiar e documentar lei localitats concernidas, explicar lo cas e evitar d’estendre una informacion parciala a tota la comuna.