OsmAnd

Objectiu: emplegar OsmAnd per GPS occitan sus lo telefonet, amb de mapas telecargadas e d’itineraris que pòdon fonccionar sensa lo malhum.

1 — Installar OsmAnd

1. Installatz OsmAnd sus Android ò iPhone.
2. Durbètz l’aplicacion e autorizatz la posicion precisa quand vos o demanda.
3. Chausissètz un perfil segon vòstre us: veitura, bicicleta ò caminada.
4. Reglatz la lenga de l’aplicacion.
5. Sus Android: Paramètres → Paramètres OsmAnd → Lenga d’afichatge. Sus iPhone: Reglatges dau telefonet → OsmAnd Maps → Lenga.

2 — Telecargar lei mapas

1. Durbètz Menú → Mapas e ressorsas.
2. Cercatz la region que vos fa mestier e telecargatz la mapa estandard.
3. Per un percors lòng, telecargatz totei lei regions traversadas: lo GPS a pas de cambas per anar cercar una mapa mancanta.
4. Verificatz puei dins l’onglet dei ressorsas localas que lei mapas i son bèn installadas.

Occitania se repartisse entre mai d’un Estat e fòrça regions de telecargament. Fau donc preparar lei mapas necessàrias segon vòstre percors.

3 — Afichar lei noms occitans

1. Durbètz Configurar la mapa.
2. Sus Android: Menú → Configurar la mapa → Rendut de la mapa → Lenga de la mapa. Sus iPhone: Menú → Configurar la mapa → Lenga → Lenga de la mapa.
3. Chausissètz occitan coma lenga preferida.
4. Zoomatz au nivèu d’una vila ò d’un vilatge e verificatz quauquei noms.

OsmAnd aficha lei formas occitanas presentas dins OpenStreetMap. Se lo nom occitan manca, l’aplicacion o pòt pas devinar: aquò nos dona justament una bòna rason de contribuir.

4 — Reglar la votz

Per ara, pecaire, OsmAnd pren pas en carga de votz occitana. Un projècte es en cors per ne’n crear una. Gardatz paciéncia.

5 — Preparar un itinerari

1. Tocatz lo boton de navigacion.
2. Indicatz la destinacion, puei lo ponch de partença se prenètz pas vòstra posicion.
3. Chausissètz lo perfiu: veitura, bicicleta ò caminada.
4. Regardatz lo percors prepausat e leis avertiments.
5. Aviatz la navigacion solament quand lo percors vos convèn.

Una aplicacion calcula; vosautres decidètz. Una dralha sus l’ecran es pas totjorn una bona idèa amb una veitura.

6 — Verificar fòra linha

1. Quand siatz encara connectat, calculatz un itinerari d’assai.
2. Passatz lo telefonet en mòde avion.
3. Durbètz tornar la mapa, cercatz un luòc e calculatz un itinerari cort.
4. Se quauqua-ren manca, tornatz au malhum e telecargatz la ressorsa necessària.

A vosautres: un assai de cinc minutas

Telecargatz la mapa de vòstre relarg, chausissètz l’occitan coma lenga de la mapa e cercatz un luòc conegut. Preparatz puei un itinerari cort e verificatz-lo en mòde avion.

Question de verificacion

Se la mapa es telecargada, OsmAnd a encara besonh dau malhum per calcular un itinerari?

Veire la respònsa explicada

Non, se lei mapas dei regions traversadas son installadas e se lo calcul d’itinerari es reglat fòra linha. Per còntra, una ressorsa en linha, una mapa mancanta ò una informacion actualizada pòt demandar una connexion.

Demostracions cortas

Quatre vidèos cortas mostraràn: installar e telecargar una mapa; afichar lei noms occitans; reglar la votz; preparar e assajar un itinerari fòra linha.