Toponimia
"La toponimia es una activitat scientifica de la lingüistica qu'estúdia lei noms de luòcs (lei toponims). Se prepausa de recercar lor significacion, lor etimologia, mas tanben lors transformacions de lòng dei sègles. [...] Lo domeni de la toponimia es larg. Aquesta sciéncia estúdia en efiech lei localitats : noms de luòcs abitats (vilas, vilatges, masatges e escarts) o non abitats (luòcs diches), tanben lei noms liats au relèu, ai rius, ai vias de comunicacion (rotas, carrieras)." https://oc.wikipedia.org/wiki/Toponimia
Lo metòde toponimic orientat cartografia
Dins son principi, un toponim es una apelacion emplegada per la descripcion e la localisacion. Autant dire qu’es liada a l’activitat umana.
Sa formacion pòt èstre, a la basa, un nom comun ò un nom de persona que s’i ajustan divèrsei derivacions (sufix, prefix…) ò composicion (articles, epitèt…). Quina que siegue sa formacion, lo toponim se fixa a un moment sus un element geografic unic e dins un contèxte linguistic en evolucion.
Lo premier principi de la recèrca toponimica es de remontar lo pus luenh possible dins lo procès de fixacion e d’establir l’istoric dei formas que pren. cf. Ficha. toponimica
Per ansin, l’examen dei formas ancianas es essenciau. Es la rason qu’un toponimista occitan deu conóisser lo latin e l’occitan ancian. De mai, una bòna conoissénça de la fonetica istorica es indispensabla per pas menar a un lectura erronèa.
L’enquista sus plaça permet de relevar lo contèxte dialectau e geografic. L’arqueologia, l’istòria son de prendre en còmpte. Abitat, vestigis e activitats umanas dispareissuts son sovent conservats dins lo nom dau luòc.
Avís que la recèrca toponimica orientada vèrs la restitucion e la cartografia cèrca pas, a tota fòrça a trobar la significacion dau toponim (foguèsse a remandar a de racinas supausadas...).
La finalitat aicí es la restitucion de la forma autentica per un usatge sociau actuau.